Kölsche Lyrik – Vorfreude auf das Dreigestirn 2018/2019

Kölsch ist wie Latein – nur intelijente Lück spreche dat.  Hier 2 Gedichte von Klaus Peters:

 

Mer sin Dreijesteen

 

Drei Weise us däm Morjenland,

die sin en Kölle jot bekannt!

Vun denne schwad jeder en andere Sproch,

doch verstonn sich die Drei trotzdäm jot jenoch!

Nit lang un se woren sich em klore,

dat se echte Fründe wore!

 

Se folgten enem Stän, vun d´r Fröh, bes zum Ovend,

dä maht Halt üvver Kölle, do wor Fastelovend!

Die Kölsche mahten keine lange Bohei

un schnappten sich tirek die Drei!

Ein Jrupp, die hat en dolle Idee, die nannten sich:

Et Fesskumitee!

 

Die hüllten die Drei en edle Zwirn

un nannten se: Uns Dreijestirn!

Zickdäm jitt et en Kölle ald ärch vell Johre,

drei Käls, die Dreijesteen, wäde, sin, oder wore!

Em nächste Johr weed uns GA vör Freud janz verröck,

m´r sin „Ratsch us däm Hüsje“, wat hann m´r e Jlöck!

 

E jroß M hätt jeder em Name,

domet se sich och jot verdrage!

Die Drei heißen, wie d´r Zofall et well:

Marc, Markus un Michael!

Nor wann die Jungfrau proklameet,

weed „Michael“ koot uszoteet.

Dann nennt sich de Jungfrau, dat finge m´r prima,

esu wie ehr Dochter Catharina!

 

Die Drei sin richtisch staatse Junge,

die sin däm Härjott jot jelunge!

Se schwade nit Kölsch, döför met däm Hätz,

dröm Kölsche, sitt nit zo entsetz!

Se hann et Hätz om rächte Fleck,

sin super drop un super jeck!

 

Die krijje vum Fasteleer niemols jenoch,

stonn op uns Kölle un uns Sproch!

Die Drei hann ehr Heimat un dat mäht och Senn,

do, wo se jroß jewode sin!

Se schwöre op Strüßcher un Kamelle,

e jroß Stöck Heimat, dat es Kölle!

 

Drei Jesellschafte sin jläuv ich niemols jlöcklicher jewäse:

Uns Große Allgemeine, die Schlenderhaner un die Lese!

Mer wünschen üch en jrandiose Session,

m´r sin unendlich stolz un freue uns schon!

 

 

Uns Hätz klopp laut, voll Stolz un Ihr,

et beste Dreijesteen sitt ehr!

Ehr sollt die Zick nie em Levve verjesse,

wie jlöcklich m´r sin, dat kann keiner ermesse!

Un Rusemondaach keine Rän:

Alaaf! Och mer sin Dreijesteen!

 


 

Wann et loss jeiht!

 

Nit mieh lang, dann es et esu wick,

dann kütt för üch Drei de jrößte Zick!

Dä Puls dä ras, d’r Blutdruck steich

un och de Knee, die wäden weich!

Mänchmol muss m’r sich selvs ens zwicke,

ehr Drei sitt bal uns Oberjecke!

 

Am 11.11. om Aldermaat vör 30.000 Jecke,

do künnt ehr dann Kölle en et Hätz janz deef blecke!

M’r loht un süht nor  e bunt Jewöhl,

Kölle es kein Stadt, Kölle es e Jeföhl!

 

Ehr denkt, es dat schön he, do leever Jott

un vielleich kniept ehr höösch e paar Trone üch fott!

Et es wie ne Ruusch un m’r kritt nit jenoch,

nit vun dä Leeder, vum Alaaf un vun unserer Sproch!

 

Ehr loht en d’r Himmel un denkt aan ür Fraue,

die sin üre Rückhalt un op die künnt ehr baue!

Termine, Termine, av hück jeden Daach,

dat jeiht morjens loss un duurt bes en de Nach!

 

Winnisch Schlof un janz bestemp Stress,

doch wichtisch es, dat ehr ür Freud nit verjesst!

Denn Dreijesteen weed m’r nor eimol em Levve,

dä Spass, dat Jeföhl, kann üch keiner mieh nemme!

 

Wann ehr Rusemomdaach durch Kölle fahrt,

dann doht et jeneße, ehrhatt lang drop jewaht!

Un wann Äschermettwoch d’r Fastelovend säht: „Stopp!“

Dann joht jlöcklich noh Huus, do fängk m’r üch op!

 

För uns drei Jesellschafte es janz jewess klor,

wie stolz jederein vun uns op üch wor!

Och mer verjesse niemols die Zick

un stonn met Alaaf aan ürer Sick!

 

0 Kommentare

Dein Kommentar

An Diskussion beteiligen?
Hinterlasse uns Deinen Kommentar!

Schreibe einen Kommentar

Deine E-Mail-Adresse wird nicht veröffentlicht. Erforderliche Felder sind mit * markiert.